Өзбекәлі Жәнібеков атындағы Оңтүстік Қазақстан педагогикалық университетінде 25-қазан Республика күніне арналған “Егемен елім: кеше, бүгін және ертең” тақырыбындағы апталық ашылды.
Апталықтың ашылу салтанатында университет Басқарма төрағасы-ректор міндетін атқарушы Гүлжан Сүгірбаева құттықтау сөз сөйлеп, мерекенің мән-маңызы мен ұйымдастырылып жатқан жұмыстарға тоқталды.
19 қазан күні апталықтың бірінші күнінде Қазақстандағы АҚШ-тың елшісі Дэниел Розенблюм «Дархан дала дүбірі» ұлттық өнер және қолөнер көрмесінің алғашқы құрметті қонағы болды. Сондай-ақ, ғалым-ұстаз Әбсаттар Дербісәлі атындағы ғылыми кітапхананың «Егемен елім: кеше, бүгін және ертең» кітап көрмесі өз жұмысын бастады. Көрмеге егемен еліміздің тарихы, дамуы, болашағы турасында ғылыми еңбектер қойылған.
Ал, «Инновациялық Қазақстан және болашаққа көзқарас» IT технологиялар көрмесі өскелең ұрпақты ғылыми-техникалық шығармашылыққа баулу, студенттер мен педагогтердің үздік IT-шешімдерін анықтау, қолдау және тарату, жаңа инновациялық технологияларды ұсыну, педагогтердің кәсіби құзыреттілігін арттыруға арналады.
Апталық аясында бұдан басқа да бірнеше бағдарламалар мен жобалар өткізіледі.