Лес Мамаев — Қазақ ССР ағарту саласының озық қызметкері, профессор, Кеңес Одағы халық ағарту ісінің үздігі, 15 ғылыми еңбек пен жоғары оқу орындарының студенттері үшін жазылған көптеген оқу-әдістемелік құралдары мен ғылыми мақалалардың авторы. Алғашқы еңбек жолын Шымкент педагогикалық институтының жоғары математика кафедрасында оқытушы болудан бастап, аға оқытушы, кафедра меңгерушісі, декан болып қызмет етті. Жастарды тәрбиелеуге үлкен жауапкершілікпен қараған ұстаз.
Өзбекәлі Жәнібеков атындағы Оңтүстік Қазақстан педагогикалық университетінде белгілі профессордың атына арнайы дәрісхана ашылды. Салтанатты рәсімде университет Басқарма төрағасы-ректор міндетін уақытша атқарушы Гүлжан Сүгірбаева құттықтау сөз сөйлеп, құрметті қонақтармен бірге аудиторияның лентасын қиды. Лес Мамаевтың туған-туыстары мен әріптестері естеліктерімен бөлісті. Физика-математика факультетінің студенттері қазақ күйлерін домбырамен нақышына келтіре орындады.
Жөндеу жұмыстары жүргізіліп, жаңа жабдықтармен қамтылған №246 дәрісханада физика-математика факультетінің студенттері білім алады.