ҒАСЫР МЕРЕЙТОЙЫН ТОЙЛАҒАН ҒАЛЫМ ҚАПИРА СӘДУАҚАСОВА АТЫНДАҒЫ ДӘРІСХАНА АШЫЛДЫ
Өзбекәлі Жәнібеков атындағы Оңтүстік Қазақстан педагогикалық университетінде ғалым, ұлағатты ұстаз, аяулы жар, профессор Қапира Сәдуақасованың 100 жасқа толған мерейтойына арналған «Профессор Қапира Сәдуақасова атындағы “Ежелгі дүние тарихы” дәрісханасының салтанатты ашылу рәсімі өтті. Дәрісхана лентасын қоғам қайраткері Сексенбай Тұрысбеков пен ардагер-ұстаз Жүзбай Қырғызбаев қиып, Басқарма төрағасы – ректор м. а. Әлібек Нұртаев құттықтау сөз сөйледі. Ғасырға толған мерейтой иесінің ғибратты ғұмырын, білім саласындағы және шәкірт тәрбиелеу ісіндегі ерен еңбегін баяндаған университет басшысы ғалым өмірі кейінгі ұрпаққа өнеге екенін жеткізді.
Аталмыш дәрісхананы жөндеуден өткізіп, заман талабына сай жабдықтаған меценат, университет түлегі Мағауия Сексенбайұлының әкесі, қоғам қайраткері Сексенбай Тұрысбековке құрмет көрсетіліп, сый-сияпат тарту етілді. Тағылымды шараға Қапира Сәдуақасованың қызы Салтанат Тілеукеева, күйеу баласы Ерман Тұрсынбаев және әріптестері мен шәкірттері қатысты. Келген қонақтарға ғалымның өмір жолы мен ғылыми-педагогикалық қызметі жайлы бейнеролик көрсетілді. Белгілі ақын, «Айтыс» үйірмесінің жетекшісі Нұрғали Әнапия жырдан шашу шашса, дәстүрлі әнші Бекзат Сәкенұлы домбырамен терме орындап, насихат айтты.
Қапира апайдың әріптестері мен шәкірттері жүзге толған ұстаздарына ыстық ықыласқа толы жылы лебіздерін арнады. Осы оқу орнында оқып, қызмет етіп, өмірден өткен доцент С.Әбубәкіровтің жары Баян Байзақова, университеттің 1982 жылғы түлегі Ұлбосын Көмекбаева ұстаздарының сабақ беру әдістері, студенттерге деген қамқорлығы мен ғылыми еңбектері жайлы сөз етті. Іс-шара соңында қатысушылар профессор Қапира Сәдуақасованың есімі берілген «Ежелгі дүние тарихы» дәрісханасымен танысып, естелікке суретке түсті.



Осыған ұқсас
ШЕТЕЛДІК БІЛІМ АЛУШЫЛАРҒА АҚПАРАТТЫҚ КЕЗДЕСУ ӨТТІ
«БОЛАШАҚ» БАҒДАРЛАМАСЫ АЯСЫНДА ХАЛЫҚАРАЛЫҚ ТӘЖІРИБЕ АЛМАСУ СЕМИНАРЫ ӨТТІ
«ДИПЛОМНАН ҚҰЗЫРЕТТІЛІККЕ: БОЛАШАҚ ПЕДАГОГТЫҢ КӘСІБИ КАПИТАЛЫ» ТАҚЫРЫБЫНДА КЕЗДЕСУ ӨТТІ
ЖАСАНДЫ ИНТЕЛЛЕКТ ДӘУІРІНДЕГІ БІЛІМ ФИЛОСОФИЯСЫ: ХАЛЫҚАРАЛЫҚ ҒЫЛЫМИ КОНФЕРЕНЦИЯ ӨТТІ
РУХАНИ ҚАУІПСІЗДІК ЖӘНЕ САНАЛЫ ТАҢДАУ
ӨЛЕҢ МЕН ӨНЕР ТОҒЫСҚАН ПОЭТИКАЛЫҚ КЕШ
БҰРЫМДЫ ҚЫЗ – ҰЛТ КӨРКІ
СТУДЕНТТЕРГЕ «АБАЙ ФЕНОМЕНІ», «ТОЛЫҚ АДАМ» ІЛІМІ ЖӘНЕ ӘДІЛЕТТІ ҚОҒАМ ҚҰНДЫЛЫҚТАРЫ ТҮСІНДІРІЛДІ
«ОЙ ҚОЗҒАУ ОРТАЛЫҒЫ»: УНИВЕРСИТЕТТІҢ СТРАТЕГИЯЛЫҚ ДАМУ БАҒЫТТАРЫ ТАЛҚЫЛАНДЫ