Өзбекәлі Жәнібеков атындағы ОҚПУ-да кезекті Ғылыми кеңес мәжілісі өтті. Мәжілісте университеттің білім беру, ғылыми-зерттеу және стратегиялық даму бағыттарына қатысты маңызды мәселелер қаралды.

Күн тәртібінде кәсіптік практиканың нәтижелерін бағалау және саралау мәселесі талқыланды. Бұл бойынша «Talant» апгрейд орталығының басшысы Қоразбекова Қарлығаш баяндама жасап, студенттердің тәжірибелік даярлығын жетілдіру бағытындағы жұмыстарға тоқталды.

Сонымен қатар, Физика-математика факультеті деканының міндетін атқарушы Рахашев Бақытғали факультеттің стратегиялық жоспарының орындалуы мен алдағы даму перспективалары жөнінде есеп берді. Баяндамада оқу-әдістемелік жұмыстарды жетілдіру, ғылыми әлеуетті арттыру және білім сапасын көтеру мәселесі қаралды. Ал, Дене шынықтыру және спорт факультеті деканы Демеуов Ахан факультеттің стратегиялық жоспарының орындалуы мен алдағы міндеттері туралы баяндама жасады. Онда білім беру сапасын арттыру, спорттық инфрақұрылымды дамыту және студенттердің кәсіби даярлығын күшейту бағытындағы жұмыстар талқыланды.

Ғылыми кеңес мәжілісінде бірқатар маңызды шешімдер қаралды. Атап айтқанда, 2025–2026 оқу жылындағы қысқы қабылдау бойынша 1-курсқа қабылданған докторанттардың докторлық диссертация тақырыптарын бекіту және ішінара өзгерістер енгізу мәселесі талқыланды. Сонымен бірге, 2026–2027 оқу жылына арналған докторантураның қабылдау емтихандарын ұйымдастыру мақсатында жаңартылған емтихан сұрақтары, эссе тақырыптары және сұхбаттасу, емтихан, апелляциялық, эссені тексеру комиссияларының құрамдары бекітілді.

Кеңес барысында 2026–2027 оқу жылына арналған қабылдау комиссиясының құрамын бекіту, сондай-ақ «Өзбекәлітану» пәнін барлық бакалавриат білім беру бағдарламаларының оқу жоспарларына енгізу мәселелері де қарастырылды.

Сонымен қатар, қауымдастырылған профессор (доцент) ғылыми атағына және қауымдастырылған профессор (доцент) міндетін атқарушы ғылыми атағына ұсыну, монографиялар мен оқу құралдарын баспаға ұсыну туралы шешімдер талқыланып, тиісті қаулылар қабылданды.